Երևանի քաղաքապետ ընտրվելու դեպքում քաղաքի բնակչությանը խոստանում եմ՝ այլևս չեք տեսնի անճաշակ ձևավորումներ, ամոթալի դեկորատիվ ու քանդակային գործեր: Մենք կստեղծենք ճարտարապետներից, նկարիչներից, դիզայներներից, քանդակագործներից և պատմաբաններից բաղկացած հեղինակավոր հանձնախումբ, առանց որի չեն տեղադրվի քաղաքի դեմքը ձևավորող հուշարձաններ կամ այլ գործեր: Մեզ համար չափանիշ պետք է լինի մեծ վարպետ Երվանդ Քոչարի <Սասունցի Դավիթ> արձանը, վերջերս կյանքից հեռացած քանդակագործ Նիկողոս Նիկողոսյանի՝ Միքայել Նալբանդյանին նվիրված հուշարձանը, Սերգեյ Մերկուրովի հեղինակած Շահումյանի մոնումենտը: Մեզ պետք չեն անճաշակ նվերներն ու քանդակները, որոնք ստեղծվել են կիսագրագետ մեծահարուստի քմահաճույքով և խառնաշփոթ կերպով լցված են քաղաքում:
Փառք Աստծու, մեր ժողովուրդն ունի բազմաթիվ տաղանդավոր նկարիչներ և քանդակագործներ, որոնք մրցութային ընտրության սկզբունքով ունակ են ստեղծել համաշխարհային մասշտաբի և մեծության գործեր: Մենք պարտավոր ենք արժանի կերպով ներկայացնել մեր քաղաքը Հայաստան այցելող հազարավոր զբոսաշրջիկներին, պարտավոր ենք արժանի ժառանգություն թողնել մեր զավակներին:
Ռեֆորմիստների կուսակցության Երևանի քաղաքապետի թեկնածու՝Արտակ Ավետյան
