«Ես չեմ հասկանում՝ ինչ է կատարվում. Մենք ոչնչից տեղյակ չենք, բիզնես գործընկերներից ենք իմանում, որ նման բան է սպասվում». «Մանանա Գրեյն» ՍՊԸ տնօրեն

Սեպտեմբերի 15-ից Վրաստանի տարածքում բեռնատարներով ցորենի ներկրումն ու տեղափոխումն արգելելու մասին Վրաստանի կառավարության որոշումը, որ շրջանառության մեջ է դրվել մոտ 1 ամիս առաջ, այսօր քննարկման թեմա էր դարձել ՀՀ Ազգային ժողովում։ Որոշմամբ սահմանվում է, որ փոխադրումները պետք է իրականացվեն՝ ջրային, այնուհետև՝ երկաթուղային ճանապարհով։

«Ելք» խմբակցության պատգամավոր Էդմոն Մարուքյանն ահազանգեց, որ դրա հետևանքով տոննայի մեջ 50 դոլարով կթանկանա ցորենը, եթե միայն Փոթիով գա: «Մենք եղբայրական պետություններ ենք, և ես կարծում եմ, որ Հայաստան-Վրաստան բարեկամական խումբը պետք է զբաղվի այս հարցով»,- ասել էր նա:

Հայաստան-Վրաստան բարեկամական խմբի ղեկավար, ԱԺ փոխնախագահ Էդուարդ Շարմազանովը, ընդգծելով, որ մինչև նշված ժամկետը պաշտոնական այց են ունենալու Վրաստան և ամեն ինչ կանեն խնդիրը հարթելու համար, այնուամենայնիվ, դրա պատասխանատու էր համարել կառավարությանը։

Հացահատիկի խոշոր ներկրող «Մանանա Գրեյն» ՍՊԸ-ի տնօրեն Գուրգեն Նիկողոսյանը 168.am-ի հետ զրույցում նշեց, որ վրացական կողմը կեղծ հիմնավորումներ է բերում, իբրև թե այս փոփոխության նպատակը զբոսաշրջության զարգացման խոչընդոտների վերացումն է։

«Կարծում եմ՝ խնդիրը նավահանգիստներն ու երկաթգծերն աշխատեցնելն է։ Ավտոտրանսպորտը, որն այլընտրանքային բեռներ տեղափոխող միջոց է, օրենքով սահմանափակում են, որ մենաշնորհային ոլորտները՝ երկաթուղին ու նավահանգիստները, աշխատեն։ Դրա հետևանքով Հայաստանը կունենա բարձր գներով ցորեն կամ ալյուր»,- ասաց Գ. Նիկողոսյանը՝ հաշվարկելով, որ Ռուսաստանում ցորենի այսօրվա գների դեպքում 1 տոննան կթանկանա առնվազն մոտ 70 դոլարով, կամ 1 կիլոգրամ ալյուրը՝ 40-50 դրամով։

Թե ո՞րն է խնդրի լուծումը, տնտեսվարողը նշեց, որ կա ՀՀ կառավարությունը, որն ինքը պետք է բանակցի վրացական կողմի հետ, ոչ թե գործարարները։ Ըստ նրա՝ Հայաստանի միակ ցամաքային ճանապարհը Լարսն է, իսկ վրացիները խնդիր չունեն, որովհետև կարող են օգտագործել Ադրբեջանից եկող երկաթգծային ուղին, և թանկացումը մեծ չի լինի։

Գ. Նիկողոսյանը դժգոհություն հայտնեց, որ նման լուրերին գործարարները տեղեկանում են այլ աղբյուրներից, և ոչ թե՝ ՀՀ կառավարությունից. «Մի՞թե մենք չունենք Տրանսպորտի նախարարություն, որ մեզ ժամանակին տեղեկացնի այդ մասին։ Ինչո՞վ են զբաղված Տրանսպորտի նախարարությունում՝ հարկատուների փողերն ուտելով ու ոչինչ չանելո՞վ։ Մենք ոչնչից տեղյակ չենք, բիզնես գործընկերներից ենք իմանում, որ նման բան է սպասվում։ Ես չեմ հասկանում՝ ինչ է կատարվում։ Տրանսպորտի նախարարությունը եթե գումարներ է գանձում տրանսպորտի ընկերություններից, պետք է տեղեկատվություն տա՞, թե՞ ոչ»։

Գ. Նիկողոսյանը նշեց, որ ՀՀ կառավարությունն իրավունք ունի չհամաձայնելու Վրաստանի այս որոշման հետ, քանի որ Հայաստանն այլընտրանքային ճանապարհ չունի, իսկ միջազգային կոնվենցիաներն արգելում են նման գործողությունները։

Նիկողոսյանի հետ մեր զրույցից հետո ՀՀ տրանսպորտի, կապի և տեղեկատվական տեխնոլոգիաների նախարարության լրատվական ծառայությունը հաղորդագրություն տարածեց վրացիների հետ ձեռք բերած պայմանավորվածության մասին։

«Այս որոշումն ուղղված է Վրաստանի տարածքով տվյալ տեսակի բեռնափոխադրումներ իրականացնող բոլոր երկրներին։

Առաջարկվող ճանապարհով դեպի Հայաստան նշյալ կուլտուրաների փոխադրումների սակագների բարձրացումը կանխելու նպատակով՝ Հարավկովկասյան և Վրացական երկաթուղիների ղեկավարների միջև ընթանում են բանակցություններ։

Նախնական պայմանավորվածության համաձայն՝ Վրացական երկաթուղին մեր փոխադրողների համար կկիրառի զեղչային համակարգ, ինչի արդյունքում ակնկալվում է, որ փոխադրումների գինը չի բարձրանա»,- ասվում է հաղորդագրության մեջ։

Նմանատիպ նորություններ

«Դուխովներին» ենթարկել խստագույն քրեական պատասխանա... Քաղաքագետ Արթուր Ղազինյան ֆեյսբուքյան իր էջում անդրադարձել է մամուլի հրապարակմանը, ըստ որի՝  Մեղրիի զորամասերից մեկում տեղի ունեցած խնդրից հետո զինվոր...
Փաշինյանի միմոսության ժամանակը շուտով պետք է ավարտ... Փաշինյանի միմոսության ժամանակը շուտով պետք է ավարտվի Պետության առջև ծառացած բազմաթիվ խնդիրները լուծելու անկարողությունը Փաշինյանին դրդել է մասն...
Թարս ձեռնոցներով թարս շաբաթօրյակ.AntiFake.am... Թարս ձեռնոցներով թարս շաբաթօրյակ Վերևներից իջեցված համապետական մաքրության օրակարգը գուցե ավելի լավ վերջաբան ունենար, եթե դրա մեկնարկը չտրվեր թարս...
Մասրիկ գյուղը նշեց Ապրիլյան պատերազմի հերոս նահատա... Ողջ Փոքր Մասրիկ գյուղը նշեց Ապրիլյան պատերազմի հերոս նահատակ Վրեժ Սարգսյանի ծննդյան 30 ամյակը Վրեժ Վարդանի Սարգսյանը ծնվել է 1989թ․ մարտի 22-ին...
«Շրջում ենք քաղաքում, մաքրում կարմիր գծերը». ակցիա... Երևանում «Հանուն արդարության» հասարակական վերահսկողական նախաձեռնությունը համապետական շաբաթօրյակի շրջանակում ակցիա է իրականացնում՝ հիշեցնելով Կարմի...
Նախագահ Արմեն Սարգսյանը շաբաթօրյակին մասնակցում է ... ՀՀ նախագահ Արմեն Սարգսյանն համապետական շաբաթօրյակին մասնակցում է թոռնիկների հետ։ Այս մասին տեղեկացնում է ՀՀ նախագահի աշխատակազմի ֆեյսբուքյան էջ...
Ի վերջո, պետք չէ պետական կառույցների պաշտոնական ան... Հարգելի ՀՀ քաղաքացիներ, Երեկ «Հայկական Առողջապահական Ազգային Խորհուրդ» ՔՀԿ կոալիցիան դիմել է ՀՀ Ազգային Ժողովի նախագահին, Առողջապահության և սոց...
Չի կարելի աղբի մեջ կանգնել և հանդիսավոր միջոցառում... Համազգային թատրոնի նոր շենքի հիմնարկեքի արարողությունը հետաձգվեց, քանի որ վարչապետ Նիկոլ Փաշինյանը, տեսնելով տարածքը՝ աղբի մեջ կորած, սկսեց աղբ հա...

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով