Այսօր կառավարության դիմաց մի խումբ քաղաքացիներ ահազանգեցին, որ իրենց անասունների միսը չի վաճառում, քանի որ քսան տոկոս ավելացրած արժեքի հարկի պատճառով սուպերմարկետներն իրենցից միս չեն գնում: «Մեր անասունները մնացել են գոմերում, չեն վաճառվում: Յոթ ամիս այդ անասունին պահել ենք, դարձրել ենք մորթելու և արդեն պետք է շուկա հանենք, հարկեր են դրվել, դրսից միս են բերում, և մեր անասունը չի վաճառվում»,-ասաց գյուղացիներից մեկը:
Բողոքողներից մեկը պարզաբանեց, որ մինչ հեղափոխությունն ավելացրած հարկը սուպերմարկետները մուծում էին երկու տոկոս, հիմա` քսան տոկոս, և սուպերմարկետները ցանկանում են, որ դա գյուղացին վճարի. «Բացի այդ էլ, մսի ավելցուկ կա, դրա պատճառն էլ այն է, որ դրսից անարգել միս են բերում»:
Գյուղացիները նշեցին, որ նախկինում մսի կիլոգրամը վաճառվում էր 2800 դրամով, հիմա՝ 2500-2400 դրամով: «էլի համաձայն ենք, մենակ թե այդ անասունը վաճառվի: Սուպերմարկետներն ասում են, որ մենք պետք է քսան տոկոս հարկ տանք, մեր ծախսերը հանենք և մոտավորապես հազար դրամ ավել ծախենք միսը, որ կարողանանք տեղավորվել, իսկ 3550-ով միսը չի ծախվի: Ստիպված սուպերմարկետները դրսից միս են ներմուծում, որ դատարկ չմնա տեղը»,-ասաց մսավաճառներից մեկը:
Ջերմուկ քաղաքից Արթուր Համբարձումյանը նշեց, որ ոչ մեկը չի ուզում, որ ժողովուրդը թանկ գնով միս գնի: «Պահանջում ենք, որ կառավարությունը սուպերմարկետների տերերին կանչի, խոսի, և առաջվա նման նրանք մեզնից միս գնեն»,-ասաց նա և նշեց, որ արդեն ամսից ավելի է, որ ինքն այլևս սուպերմարկետներին միս չի բերում, և վտանգ են տեսնում, որ մսավաճառների կրճատում կարող է լինել:
«Երկու հազար հոգի մնալու է անգործ, մենք էլ չենք ուզում արտագաղթենք, քանի որ մեծ հույսեր ունենք, որ լավ է լինելու»,-ասաց նա:
Արմավիրի մարզի Ջրաշեն համայնքի բնակիչ Եսայի Հակոբյանը նշեց, որ իր անասունի միսը ստիպված համագյուղացիներին է վաճառել, որ վարկերը փակի: «Անցած տարի խոտի գինն էլ թանկ է եղել երաշտի պատճառով, այսօրվա դրությամբ ամեն անասունի մեջ 50-70 հազար դրամ կորուստ ենք ունենում»: