«Այսօրվա իրավիճակը երևի թե 2016թ. մարտական գործողություններից հետո ստեղծված ամենավտանգավոր ժամանակաշրջանն է»

«168ժամ»-ի զրուցակիցն է՝ Արցախի Հանրապետության նախագահի խորհրդական Տիգրան Աբրահամյանը:

– Պարոն Աբրահամյան, Ադրբեջանի Միլի-մեջլիսի առաջին փոխխոսնակ Զիյաֆեթ Ասքերովը հայտարարել է, թե Ադրբեջանը, համաձայն ՄԱԿ-ի կանոնակարգի և իր օրենսդրության, իրավունք ունի «ռազմական ճանապարհով ազատագրել իր օկուպացված տարածքները»: Ի՞նչ իրական սպառնալիք եք տեսնում այս հայտարարության մեջ:

– Ադրբեջանը բացահայտ խոսում է հարցը ռազմական ճանապարհով լուծելու իր մտադրությունների մասին և փորձում հիմնավորել դրա օրինական լինելը: Ի դեպ, սա բազմաթիվ այլ հիմնավորումներով հնչում է նաև ադրբեջանցի այլ պաշտոնյաների շուրթերից:

– Ձեր վերջին հարցազրույցներից մեկում ահազանգել էիք, թե Ադրբեջանը պատրաստվում է ռազմական գործողությունների՝ վկայակոչելով նրանց կողմից առաջնագծի տարբեր ուղղություններով ակտիվությունը, տեխնիկայի տեղաշարժերը, դիպուկահար խմբերի, հատուկ ստորաբաժանումների ակտիվությունը: Հակառակորդի այդ ակտիվությունն ինչո՞վ են տարբերում նախկինում նրանց կողմից արված գործողություններից, ի՞նչն է հատկապես ձեզ ստիպել նման հայտարարությամբ հանդես գալ:

– Ադրբեջանի՝ ռազմական գործողություններին նախապատրաստվելու վերաբերյալ մեկնաբանությունս միայն առաջնագծում վերջին շրջանում տեղի ունեցող գործընթացներով չէ պայմանավորված: Այս հայտարարության հիմքերը կարելի է գտնել Ադրբեջանի կողմից մեծածավալ սպառազինության և զինտեխնիկայի ներկրումներով, հասարակությանը պատերազմի պատրաստելու կոչերով, ներքին և արտաքին լսարանին ուղղված ուղերձներով:

Պատերազմը չի էլ ավարտվել, ուղղակի մարտական գործողությունները դեռ ակտիվ փուլ չեն մտել:

Ինչ վերաբերում է նախորդ դեպքերում տեղի ունեցած նմանատիպ իրավիճակներին, ապա պետք է արձանագրեմ, որ այսօրվա իրավիճակը երևի թե 2016 թվականի մարտական գործողություններից հետո ստեղծված ամենավտանգավոր ժամանակաշրջանն է:

– Դուք այդ գործողությունները պայմանավորել էիք նաև Նախիջևանում և Տավուշում տեղի ունեցող զարգացումներով: Սակայն ՀՀ ՊՆ-ն պնդում է, թե հայ-ադրբեջանական սահմանին արտառոց ոչինչ չի կատարվում: Դուք ի՞նչ խնդիրների մասին էիք ակնարկում:

– ՀՀ ՊՆ-ն արձագանքել էր սոցիալական ցանցերում տարածված լուրերին, ըստ որոնց, հակառակորդը «չեզոք գոտու» հաշվին դիրքային առավելության է հասել:

Ակնհայտ է, որ ինչպես 10 տարի առաջ Արցախում, այնպես էլ՝ Նախիջևանի ուղղությամբ, Ադրբեջանն անընդհատ փորձում է կրճատել միջդիրքային հեռավորությունը, ինչը նվազագույնը կուժեղացնի լարվածությունը նաև այդ ուղղությամբ:

Կրկնում եմ՝ Արցախի, Տավուշի և Նախիջևանի ուղղությամբ տեղի ունեցող բոլոր զարգացումները միմյանց շաղկապված են, և անկախ այն հանգամանքից, թե այդ պահին ինչ բնույթի պրոցեսներ են ընթանում, ընդհանուր համատեքստում իրավիճակը մտահոգիչ է:

– Ադրբեջանը ձեռք է բերել բելառուսական արտադրության թվով 10 «Պոլոնեզ» համազարկային համակարգերը, որոնք, ըստ փորձագետների՝ չեն զիջում «Սմերչին», որոնք վերջերս ձեռք էր բերել հայկական կողմը: Արդյո՞ղ կարող ենք ասել, որ Ադրբեջանն այս համակարգերի ձեռքբերմանն էր սպասում՝ ռազմական գործողություններ վերսկսելու համար:

– Ադրբեջանական լրատվամիջոցներն անընդհատ տեղեկություններ են հրապարակում այս կամ այն զինատեսակների ձեռքբերման կամ Ադրբեջանում արտադրության մասին: Այս ու մի շարք այլ իրադարձություններ ցույց են տալիս, որ Ադրբեջանը նվազագույնը գնում է իրավիճակի սրման:

– ԵԱՀԿ Մինսկի խմբի համախագահերն օրերս Հայաստանում վարչապետ Նիկոլ Փաշինյանի հետ հանդիպման ժամանակ կրկին կարևորել են Վիեննայի ու Սանկտ Պետերբուրգի պայմանավորվածությունների կենսագործման անհրաժեշտությունը: Ձեր կարծիքով, ի վերջո, ե՞րբ հնարավոր կլինի գործնականում ներդնել վերահսկման այն մեխանիզմները, որոնք նախատեսված են Վիեննայի և Սանկտ Պետերբուրգի պայմանավորվածություններով:

– Առանց Վիեննայում ձեռք բերված պայմանավորվածությունների կատարման՝ անհնար է կողմերի միջև վստահություն ստեղծել: Այնպիսի վստահություն, որը թույլ կտա կողմերին արդյունավետ բանակցություններ վարել:

Ի վերջո, եթե չեն կատարվել նախորդ պայմանավորվածությունները, իսկ դրանք վերջին 25 տարում բավականին շատ են, ապա չկա վստահություն, որ հնարավոր կլինի Ադրբեջանի հետ բանակցելու արդյունավետ միջավայր ձևավորել:

Նմանատիպ նորություններ

«Թող միանգամից Սուրբ Նիկոլի օր սահմանեն եւ սրբադաս... Կառավարությունն այսօր հավանություն տվեց օրենքի նախագծին, որով առաջարկվում է ապրիլի վերջին շաբաթ օրը նշել որպես Քաղաքացու օր` ի նշանավորումն 2018 թ...
Շիրխանյանի բաց նամակի հետքերով.Գարեգին Պետրոսյան... Երեկ համացանցում հայտնվեց պաշտպանության նախարարի նախկին տեղակալ Վահան Շիրխանյանի բաց նամակը ուղղված ՀՀ երկրորդ նախագահ Ռոբերտ Քոչարյանին։ Նման ...
«Ուրալյան ավիաուղիները» դեպի Երևան չվերթներ իրական... «Armeniasputnik»-ի տեղեկացմամբ, «Ուրալյան ավիաուղիներ» ավիաընկերությունը չեղարկել է 67 ուղղություններով չվերթեր իրականացնելու թույլտվությունը։ Այդ...

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով