«Ալիևի հայտարարությունը լուրջ է, իսկ հայ և միջազգային հանրությունը լուռ է։ Վերջին զորահանդեսին տարբեր երկրներ էին մասնակցում, որոնք հիացմունքով նայում էին, իսկ Ալիևը նման հայտարարություն արեց»,- 168.am-ի հետ զրույցում այս մասին ասաց գնդապետ, «Տիգրան Մեծ» ռազմամարզական հատուկ վարժարանի հիմնադիր-տնօրեն Կորյուն Ղումաշյանը։
Հիշեցնենք, որ Բաքվում ադրբեջանական զինուժի շքերթի ժամանակ նախագահ Իլհամ Ալիևը կրկին հայտարարել է, որ Հայաստանի հետ պատերազմն ավարտված չէ, «ավարտվել է միայն դրա առաջին փուլը»: Նա ևս մեկ անգամ հայտարարել է, թե Նախիջևանում 2018 թվականի հունիսին գործողությունների արդյունքում ադրբեջանական կողմն առաջընթաց ունի:
Թուրքիայի բանակի մասնակցությունն այդ զորահանդեսին, ըստ գնդապետի՝ վկայում է այն մասին, որ, եթե պատերազմ լինի, թուրքական բանակն Ադրբեջանի կողմից է լինելու։
«Հայկական կողմը կայծակնային արագությամբ պետք է արդիականացնի զինտեխնիկան, որ հետո չասենք՝ ուշ եղավ։ Ինչ ֆինանսական ռեսուրսներ կան՝ պետք է տրամադրել ռազմաարդյունաբերությանը, զենքերի արդիականացմանը։ Անկախ նրանից՝ աշխարհի որ երկիրն ինչ կմտածի մեր մասին։ Պատերազմն անխուսափելի է։ Մեր ու մանուկ, ամենատարեց մարդուց մինչև նորածին երեխա՝ պետք է պատրաստվենք առաջիկա պատերազմին։ Սա չի լինելու այն նույն դիվերսիոն գործողությունը, ինչ եղավ ապրիլին»,- ընդգծեց Կորյուն Ղումաշյանը։
Գնդապետն ուշադրություն է հրավիրում այն փաստի վրա, որ Ադրբեջանն արդեն թիրախավորել է Արենի գյուղը, Վարդենիսը.
«Այսինքն՝ մեր սնող ճանապարհները, որոնք գնում են Արցախ։ Դա հենց վկայում է, որ պատրաստվում են մեծ պատերազմի։ Արենիի մոտ դիրքերի առաջխաղացման ժամանակ իրենց հաղորդումը հենց նրա մասին էր, որ թիրախի տակ են պահում Արենին, Եղեգնաձորն ու Արարատ քաղաքը։ Դա իրականություն է, այդտեղից և՛ Եղեգնաձորը, և՛ Արարատը, և՛ Արենին միանշանակ թիրախավորված են։ Այդ բարձունքը, որ մերոնք ասում են, թե այնտեղից չեն կարող տեխնիկա տեղաշարժել… տեխնիկա պետք չէ, դիտորդ է պետք այնտեղ, որ ուղղորդի։ Նրանք այնտեղ թնդանոթ չեն դնելու, որ կտրեն ճանապարհը, այնտեղ մի հոգի կնստի ու կուղղորդի, կասի՝ սարքավորումներն ինչպես թիրախավորեն»։
Նրա խոսքով՝ պաշտպանվող նախարարություն ունենք, դրա համար էլ անունը պաշտպանության նախարարություն է, այլ ոչ՝ ռազմական. «Սպասում ենք, թե երբ պետք է մեր գլխին տան, որ մենք պաշտպանվենք։ Այս պատերազմը լայնածավալ է լինելու, շատ լավ տեսանք, թե ինչ տեխնիկա է գնել։ Նրանց ցուցադրած զենքերը լուրջ զենքեր են։ Տեսեք, որ հետո ուշ չլինի։ Սրա մասին չեն բարձրաձայնում Հայաստանում, իսկ Ադրբեջանի նախագահն ամբողջ աշխարհի առաջ ասում է, թե հայկական հողերն իրենցն են։
Մինչ Հայաստանում թալանում էին բանակը, Ադրբեջանում զբաղված էին բանակաշինությամբ, զարգացրել են զինտեխնիկան։ Զորահանդեսի ժամանակ ուշադրություն էի դարձնում իրենց զորքի քայլվածքին, զենքերին, սաղավարտներին. ամեն ինչ նոր էր։ Նրանց քայլն էլ կորեական բանակի կարգապահ քայլ էր»։
Պատերազմ տեսած մարդը, ըստ գնդապետի՝ շատ լուրջ կընդունի այս ամենը. «Նրանք զենքերը ցույց տվեցին, բայց դա չի նշանակում, որ հենց այսօր կհարձակվեն։ Նրանք կհարձակվեն աշնանը կամ գարնանը, դրա համար եմ ասում՝ մենք ժամանակ չունենք, կայծակնային արագությամբ պետք է մեր ծրագիրն իրականացնենք»։
