Հանրապետականը միտումնավոր քվորում չի ապահովում, լրագրողների հետ զրույցում ասաց «Ծառուկյան» խմբակցության պատգամավոր Նաիրա Զոհրաբյանը:
«Իրենց նպատակն այս օրերին քվորումի տապալումն է, որպեսզի առնվազն մինչև ամսի 7-8-ը դեբատներից և հնարավոր կրքերի լարումից խուսափեն», – նշեց նա:
Նաիրա Զոհրաբյանը նաև նշեց, որ եթե երեկ ամբիոնից հայրենասիրության մասին ՀՀԿ-ական պատգամավորների հնչած հայտարարությունները համապատասխանեին ճշմարտությանը, նրանք խոհեմություն կունենային և անցնցում կզիջեին իշխանությունը:
«Մեկ բառով ասած՝ սա նշանակում է պատերազմ հայտարարել սեփական ժողովրդին, իսկ նրանք, ովքեր սեփական ժողովրդին պատերազմ են հայտարարել, ջախջախվել և պարտվել են: Թե իրենք, թե իրենց սերունդները իրենց վրա դավաճանի խարանն են կրելու», – նշեց Զոհրաբյանը:
Խոսելով այս օրերին սահմանի լարվածության մասին՝ Զոհրաբյանն ասաց, որ նման հայտարարությունները միշտ արվում են, երբ որևէ ընդդիմադիր շարժում իր պիկին է հասնում:
«Եթե սահմանին լարված է, ապա լարված է այն պատճառով, որ այսօր ունենք իշխանություն, որը չի տիրապետում իրավիճակին», – հավելեց նա: