Հրաժարականի պահանջ. հայտնի դղյակի հետքերով.

Մոնումենտի այգում վարչապետ Կարեն Կարապետյանի դղյակի «բացահայտումից» հետո տրամաբանական կլիներ, որ քաղաքական դաշտում հնչեր Կարեն Կարապետյանի հրաժարականի պահանջ: Համենայնդեպս, տարբեր երկրներում այդպիսի պահանջ է հնչում կոռուպցիոն սկանդալներից հետո:

Քաղաքակիրթ երկրներում դա հանգեցնում է աղմկոտ հրաժարականների կամ նրան, որ քաղաքական գործիչները սրբագրում են իրենց ծրագրերը` վարկանիշների անկման հետևանքով: Այս տարվա սկզբին` նախագահական արշավի միջնամասում, պահպանողական Ֆրանսուա Ֆիյոնը համարվում էր Ֆրանսիայի նախագահի հիմնական հավակնորդը, ընտրությունների արդյունքում միայն երրորդն էր՝ կոռուպցիոն սկանդալների կիզակետում հայտնվելու հետևանքով:

Նույնիսկ այն երկրներում, որոնք ավտորիտար են և հասարակության կարծիքը որոշիչ չէ իշխանությունների համար, կոռուպցիայի դեմ պայքարը միավորում է քաղաքական ուժերին, նրանց և հասարակությանը: Ռուսաստանում հակակոռուպցիոն պայքարն է Ալեքսեյ Նավալնիի շարժման, պայքարի հիմնական լեյտմոտիվը:

Ընդդիմության առաջնորդը սկանդալային տեսանյութ է հրապարակել վարչապետ Դմիտրի Մեդվեդևի դղյակների մասին, նա շրջում է երկրի քաղաքներում և փաստերի հիման վրա պնդում, որ երկիրը ղեկավարում են գողերը: Նույնիսկ հարևան Ադրբեջանում ընդդիմության հանրահավաքները հակակոռուպցիոն են, որովհետև ընդդիմությունը կարծում է, որ նավթադոլարներն ուղղվում են ոչ թե երկրի զարգացմանը, այլ Ալիևի բռնապետության ամրապնդմանը: Հայաստանում չենք հիշում հանրահավաք հակակոռուպցիոն օրակարգով:

Այնպիսի տպավորություն է, որ Հայաստանի իշխանության ղեկին «հրեշտակներ» են, ովքեր ամբողջ օրը մտածում են հասարակության բարօրության մասին: Իրականում Հայաստանում հաստատված իշխանությունը կոռումպացվածներից մեկն է Արևելյան Եվրոպայում, ինչի ակնհայտ դրսևորումներն են թե՛ օլիգոպոլ մենաշնորհային տնտեսությունը, թե՛ խորհրդարանական ընտրությունները, որոնք քաղաքական կոռուպցիայի դրսևորում էին նույնիսկ միջազգային գնահատականների համաձայն: Չնայած այս հանգամանքին՝ Հայաստանի որևէ կուսակցություն, ընդդիմադիր ուժ կոռուպցիայի դեմ պայքարը չի դարձրել իր գործունեության առանցք:

Սա մի կողմից՝ բացահայտում է մեր քաղաքական համակարգի որակը, մյուս կողմից՝ ռուսական տոտալ ազդեցության հետևանք է: Գաղտնիք չէ, որ Մոսկվան արդյունավետ վերահսկում է հենց կոռումպացված ռեժիմները, որոնց դյուրին է հնազանդ պահել կոմպրոմատների միջոցով: Մյուս կողմից՝ Ռուսաստանի և Հայաստանի իշխանությունները կապված են կոռուպցիոն բազմաթիվ գործարքներով, հանգույցներով, որոնք իրենց արտացոլումն են գտել նույնիսկ հայ-ռուսական հատկապես էներգետիկ համաձայնագրերում:

Պատահական չէ, որ Հայաստանում ԱՄՆ և ԵՄ դեսպանները հայտնվում են ռուսական լրատվամիջոցների և փորձագիտական շրջանակների քննադատության թիրախում, երբ բարձրաձայնում են կոռուպցիայի դեմ պայքարի անհրաժեշտության մասին: Եթե Հայաստանում հակակոռուպցիոն արդյունավետ պայքար ծավալվի, ապա դա ինքնաբերաբար կհանգեցնի ռուսական ազդեցության թուլացման:

Պատահական չէ հակառակ տրամաբանությունը, երբ Ադրբեջանի շուրջ ծագած վերջին միջազգային կոռուպցիոն սկանդալը դարձավ Բաքվի և Մոսկվայի նոր մերձեցման մերանը: Այս ամենի համատեքստում, երբ, չնայած հասարակական լայն արձագանքին, որևէ քաղաքական ուժ չի բարձրացնում Կարեն Կարապետյանի դղյակի հետ կապված հարցը, չեն հնչում նրա հրաժարականի պահանջներ, դա խոսում է մեր քաղաքական համակարգի, հասարակության արժեքային դեգրադացիայի մասին:

Քաղաքական ուժերի մեծ մասը հավանաբար չի ուզում հարաբերություններ փչացնել մարդու հետ, ով ամիսներ անց հավակնում է պետության ղեկին, իսկ հասարակության համար «իշխանություն» և «կոռուպցիա» բառերն անշրջելի դարձել են հոմանիշներ:

Ընդ որում, Կարեն Կարապետյանի «դղյակային բացահայտումը» խորհրդանշական, նշանային իրադարձություն է, որն ամբողջովին իմաստազրկում, բովանդակազրկում է 2018-ի քաղաքական նշանակությունը՝ մանավանդ, երբ նա հավակնում է վարչապետության նաև ապրիլից հետո: Նման արժեհամակարգով և կոռուպցիոն «բագաժով» Կարապետյանը միայն «թարմ արյուն» է ներարկելու քրեաօլիգարխիային:

Հոդվածի սկզբնաղբյուրը՝ այստեղ:

Նմանատիպ նորություններ

Զարմանալի զուգադիպությամբ ակտիվացել են հոկտեմբերի ... Զարմանալի զուգադիպությամբ ակտիվացել են հոկտեմբերի 27-հայտնի ցուցակի ներկայացուցիչները՝ Շիրխանյանը, որն իրեն վարչապետ էր կարգել, Ջհանգիրյանը, որին ...
Ռեժիսոր եւ սցենարի հեղինակ ԶՈՐԻԿ ՀՈՎՍԵՓՅԱՆԸ հանրու... «Քահանայի մեղքը» (Պրեմիերա) Ռեժիսոր եւ սցենարի հեղինակ ԶՈՐԻԿ ՀՈՎՍԵՓՅԱՆԸ հանրության դատին է հանձնել իր նոր «Քահանայի մեղքը» ֆիլմի անոնսը, որն իր...
Նիկոլն այլևս չի կարող քննադատելով իր հանապազօրյա հ... Նիկոլն այլևս ընդդիմադիր չէ, որ քննադատելով իր հանապազօրյա հացը վաստակի: Նիկոլը Հայաստանի ոչ բարով վարչապետն է և պետք է քարը քարին դնելով՝ ժողովրդի ...
Պարոնայք ղեկավարներ, արժան չգտա՞ք մի օր նվիրեք մեր...   Պարոնայք ղեկավարներ, արժան չգտա՞ք մի օր նվիրեք մեր որդիներին։ «Ապրիլի վերջին օրը նշում եք որպես քաղաքացու օր, իսկ պարոնայք ղեկավարներ...
Ստեփանավանում դպրոցականների էքսկուրսիան ավարտվել է... Քիչ առաջ արտակարգ դեպք է տեղի ունեցել Լոռու մարզում։ Shamshyan.com–ի հաղորդմամբ, ժամը 16։20-ի սահմաններում Արտակարգ իրավիճակների նախարարության ...
«Դիմակները հանելու ժամանակը».Վահան Բաբայան... Տուգանքից մինչև սփոփանք: 2016թ Փաշինյանը թեև կողմ քվեարկեց 1000 դրամների օրինագծին ասում էր«Պարոնայք, երբեմն տպավորություն է, որ մենք ուզում են...

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով