«Ժողովուրդ» թերթը գրում է. «ՀՀ Շիրակի մարզում գտնվող Արփի լիճը դատարկվում է: Բնապահպաններն ահազանգում են, որ լճից ոռոգման պատրվակով բաց թողնվող ջուրը հիմնականում ուղղվում է դրանից սնվող փոքր ՀԷԿ-երի աշխատանքներին:
«Այն պետք է դնել մշտադիտարկումների և ուժեղ վերահսկողության տակ: Կառավարությունում այս խնդիրը բարձրացված է և շուտափույթ լուծում պետք է գտնի»,- «Ժողովուրդ» օրաթերթի հետ զրույցում ասաց ՀՀ բնապահպանության նախարար Արծվիկ Մինասյանը:
Իսկ ինչով է զբաղված ջրային տնտեսության պետական կոմիտեն: Նախագահ Արսեն Հարությունյանը աշխատում է իր նախկին գործելաոճով, ինչպես «Էյ-Ի-Ջի Սերվիս» ՍՊԸ-ի գլխավոր տնօրենն էր, որ մարդիկ տարիներ շարունակ վճարում են գազի ներտնային սպասարկման համար, բայց երբեք «չեն տեսնում» այն:
Այսօրվա դրությամբ հանրապետության ջրային ռեսուրսները օր օրի նվազում են, իսկ ջրպետկոմը ղեկավարող Արսեն Հարությունյանը ջայլամի քաղաքականություն է վարում:
Երեկ «Ժողովուրդ» օրաթերթը ողջ օրվա ընթացքում փորձեց մեկնաբանություն ստանալ ստեղծված իրավիճակի վերաբերյալ, սակայն ոչ մի պատասխան չստացանք»:
Առավել մանրամասն՝ թերթի այսօրվա համարում:
