Հոգևոր առաջնորդների հանդիպում կազմակերպելով՝ Մոսկվան ընդգծում է իր դերակատարությունը․ Քաղաքագետ

Վեց տարվա ընդմիջումից հետո, ռուսաց պատրիարքի նախաձեռնությամբ, վերստին հանդիպել են Հայաստանի, Ադրբեջանի և Ռուսաստանի հոգևոր առաջնորդները:

Մոսկվայի Ս. Դանիելի պատրիարքանիստ վանքում երեկ կայացած հանդիպումից հետո Մոսկվայի և Համայն Ռուսիո Կիրիլ Պատրիարքը, Ամենայն Հայոց Կաթողիկոս Գարեգին Երկրորդը և Կովկասի մահմեդականների վարչության նախագահ շեյխ-ուլ-իսլամ Ալլահշուքյուր Փաշա Զադեն հանդես են եկել համատեղ հայտարարությամբ, մասնավորապես, ընդգծելով․ «Հայ և ադրբեջանցի ժողովուրդները մշտապես ապրելու են կողք կողքի, այդ իսկ պատճառով չկա այլընտրանք, քան խաղաղությունն ու համագործակցությունը»:

Նշելով, որ խիստ կարևոր է հրաժարվել ռազմատենչ և թշնամական հռետորաբանությունից, կոչ անելով նպաստել գերության մեջ հայտնված խաղաղ բնակիչների ազատ արձակմանը, խիստ կարևորելով կրոնական նշանակության հուշարձանների անձեռնմխելիությունը՝ հոգևոր առաջնորդները նաև հորդորում են երիտասարդությանը դաստիարակել բարյացակամության և փոխադարձ հարգանքի, խաղաղասիրության և ավանդական բարոյականության ոգով ու պատրաստակամություն են հայտնում պաշտպանել ղարաբաղյան հակամարտության հանգուցալուծմանն ուղղված խաղաղարար նախաձեռնությունները։

Հետևեք մեզ Տելեգրամում՝ t.me/lurer4news

Քաղաքագետ Ստեփան Դանիելյանի խոսքով, նման հանդիպում կազմակերպելով՝ Ռուսաստանը նպատակ ունի ցույց տալ, որ ղարաբաղյան կարգավորման գործընթացում ինքն է գլխավոր դերակատարը: «Ռուսաստանն Արևմուտքին ցույց է տալիս, որ Արցախի հարցով ինքը նաև այլ գործիքակազմ ունի, հոգևոր առաջնորդներին, և ինքը գլխավոր դերակատարն է: Առավել ևս հիմա, երբ քննարկվում է Ադրբեջանի՝ ԵՏՄ-ին անդամակցելու խնդիրը, ու նաև Թուրքիան է այդ ուղղությամբ որոշակի քայլեր կատարում՝ վատացնելով Արևմուտքի հետ հարաբերությունները: Այդպիսով Ռուսաստանը փորձում է ուժեղացնել իր դիրքերը»,- «Ազատության» հետ զրույցում ասաց Ստեփան Դանիելյանը:

Ղարաբաղյան հակամարտության կարգավորման գործում ռուսաց պատրիարքի նախաձեռնությունը նոր չէ: Երեք երկրների հոգևոր առաջնորդների նմանատիպ առաջին հանդիպումը կայացավ դեռևս 1993 թ․ մայիսին, Մոսկվայում: Իսկ Պատրիարք Կիրիլի նախորդ նախաձեռնությունն իրականացվեց հենց այն ժամանակ, երբ Ռուսաստանի կողմից ներկայացվեց ղարաբաղյան հակամարտության կարգավորման մի փաստաթուղթ, որը հետագայում ստացավ «կազանյան» անվանումը:

2011 թ․ հունիսին Կազան քաղաքում Ռուսաստանի նախագահ Դմիտրի Մեդվեդևը Հայաստանի ու Ադրբեջանի ղեկավարներ Սերժ Սարգսյանին և Իլհամ Ալիևին ներկայացրեց այդ փաստաթութղը, որը, ըստ Հայաստանի նախագահի, Ադրբեջանի ղեկավարը վերջին պահին հրաժարվեց ստորագրել:

Հետևեք մեզ Տելեգրամում՝ t.me/lurer4news

Ռուսաց պատրիարքի նախաձեռնությամբ երեք երկրների հոգևոր առաջնորդների հանդիպումներ են տեղի ունեցել 2010 թ․ ապրիլին Բաքվում և 2011 թ․ նոյեմբերին Երևանում: Ստեփան Դանիելյանը նշում է․ «Մի կարևոր պահի մասին կցանկանայի անպայման խոսել, նկատի ունեմ ՄԽ ամերիկացի համանախագահ Ռիչարդ Հոգլանդի վերջին հարցազրույցը, որն իմ կարծիքով կապ ուներ այսօրվա գործընթացների հետ:

Երբ ՄԽ համանախագահները համատեղ հայտարարություն են անում, դա ուղղված է Հայաստանին և Ադրբեջանին, իսկ երբ նրանք առաձին-առանձին են հայտարարություն անում, դա ուղղված է միմյանց: Նշանակում է՝ միջնորդներն ինչ-որ հարցում անհամաձայնություն ունեն, ինչի մասին հայտնում են: Հոգլանդի հայտարարությունն, ըստ էության, ուղղված էր Ռուսաստանի դեմ, իսկ հիմնական մեխն այն էր, որ առանց մեզ քայլեր չանեք: Եթե այս հանդիպումը դիտարկենք այդ կոնտեքստում, ապա մենք տեսնում ենք, որ այո՝ Մինսկի խմբի եռանախագահությունում կա անհամաձայնություն, և դա արդեն արտահայտվում է»,- շարունակեց քաղաքագետը:

Ըստ նրա, հոգևոր առաջնորդների այս հանդիպումը հարկավոր էր նաև Ադբեջանին: «Վերջին տարիներին Ադրբեջանում պատերազմի քարոզչությունն այնքան հզոր կերպով է տարվել, որ այդ երկրի իշխանությունները պետք է կամ պատերազմ սկսեն, կամ հանրությանն ինչ-որ կերպ բացատրեն, թե ինչու հիմա պատերազմ չեն սկսում: Այս հանդիպումը Ադրբեջանին նման «թայմ աութի» հնարավորություն է տալիս», – ասաց Ստեփան Դանիելյանը:

 

 

Parstoday

 

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով