Պեդրո Ագրոմունդը հրաժեշտ տվեց պաշտոնին

Քիչ առաջ Փարիզում ավարտվեց Եվրոպայի խորհրդի խորհրդարանական վեհաժողովի (ԵԽԽՎ) Բյուրոյի նիստը, որի ժամանակ Բյուրոն կարևոր որոշում կայացրեց ԵԽԽՎ գործող նախագահ Պեդրո Ագրամունտին հեռացնելու հարցով:

Aravot.am-ի հետ զրույցում ԵԽԽՎ հայկական պատվիրակության ղեկավար, ՀՀ ԱԺ փոխնախագահ Արփինե Հովհաննիսյանը տեղեկացրեց, որ Բյուրոն հաստատեց հոկտեմբերի 9-ին մեկնարկող` ԵԽԽՎ աշնանային նստաշրջանի օրակարգը, և հենց առաջին օրը նիստի բացումից հետո նախատեսվում է Պեդրո Ագրամունտին անվստահություն հայտնելու բանաձևի քվեարկություն.

«Նախորդ անգամ քվեարկություն չկազմակերպվեց, քանի որ ԵԽԽՎ –ի պատվիրակները, որոնք նախաձեռնել էին և ովքեր շահագրգիռ էին գործընթացը տրամաբանական ավարտին հասցնել, այն ժամանակ ներկայացրին քարտուղարություն, որ քվեարկությունը նախատեսվի հենց հոկտեմբերյան նստաշրջանի առաջին օրը` հաշվի առնելով այն հանգամանքը, որ պետք է որակյալ մեծամասնությամբ տեղի ունենա այդ քվեարկությունը:

Հետևեք մեզ Տելեգրամում՝ t.me/lurer4news

Դա նշանակում է հետևյալը` ընթացակարգը հաստատվել է. առաջինը խոսքը տրվելու է անվստահության բանաձևն առաջինը ստորագրած նորվեգացի պատվիրակին, որը կներկայացնի հիմքերը և կխոսի անվստահություն հայտնելու գործընթացի մասին: Դրանից հետո քաղաքական խմբի ղեկավարներն իրենց տեսակետները կհայտնեն: Չի լինելու դեբատ, որ այլ պատվիրակների հնարավորություն ընձեռվի տեսակետներ հայտնելու:

Հետո խոսքը կտրվի Ագրամունտին, որից անմիջապես հետո տեղի կունենա քվեարկությունը: Պահանջվում է, որ քվեարկությանը մասնակցի նվազագույնը 102 հոգի, և երկու երրորդը պետք է կողմ քվեարկի անվստահություն հայտնելուն: Երբ անվստահություն կհայտնեն Ագրամունտին, նրա պարտականությունների անցումը կվերապահվի տարիքով ավագ փոխնախագահին:

Իսկ ԵԽԽՎ նոր նախագահը կընտրվի հունվարյան նստաշրջանին»: Հարցին` ռիսկ կա՞, որ այդ 102 հոգին հնարավոր չլինի ապահովել, Արփինե Հովհաննիսյանը պատասխանեց, թե ռիսկեր միշտ կան, բայց առավել հավանական է, որ կապահովվի որակյալ մեծամասնությունը, քանի որ անվստահություն հայտնելու ստորագրահավաքին մասնակցել էր մոտ երկու հարյուր պատվիրակ:

Հետևեք մեզ Տելեգրամում՝ t.me/lurer4news

Մեր հստակեցմանը, եթե Պեդրո Ագրամունտն այս անգամ էլ ներկա չլինի նիստին, գործընթացը կարո՞ղ է շարունակվել նրա բացակայությամբ, Արփինե Հովհաննիսյանը պատասխանեց. «Նրա բացակայությունը որևէ ձևով տվյալ հարցի քննարկմանն ու քվեարկությանը չի խոչընդոտելու»:

 

Aravot.am

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով