Մայրը նորածնին վաճառել է 20 հազար դրամով… «ՀԺ»

«Հայկական ժամանակ» օրաթերթը գրում է. «Արմավիրի մարզում երեխայի վաճառքի և միաժամանակ առեւանգման մասին հաղորդումների առնչությամբ ՀՀ ոստիկանությունը կատարում է հետաքննություն:

Լրատվական ծառայությունից տեղեկացանք, որ սույն թվականի սեպտեմբերի 22-ին ոստիկանության Վաղարշապատի բաժնում հաղորդում է ստացվել Իննա Ղ.-ից: Նա հայտնել է, որ վեց ամիս առաջ մի կին հրաժարվել է իր երեխայից, տվել իրեն և պահանջել 20 հազար դրամ՝ երեխայի փաստաթղթերի հետ կապված խնդիրները լուծելու, ծննդյան վկայական տալու համար, սակայն հիմա եկել և 55 հազար դրամ է պահանջում նույն հարցի համար:

Նյութեր նախապատրաստելու ընթացքում պարզվել է, որ ապրիլի 6-ին Իննան, երեխա որդեգրելու նպատակով, այցելել է երեխայի մոր՝ Գյուլիզար Գ.-ի տուն, որտեղ նրանք համաձայնության են եկել: Նույն նյութեր նախապատրաստելու ընթացքում երեխայի մայրն էլ հաղորդում է տվել, որ փոքրիկին ապրիլ ամսին առեւանգել են: Նա նշել է, որ ապրիլի 3-ին Երևան քաղաքի Մարգարյան փողոցում՝ «Հանրապետական» ծննդատան մոտակայքում, պատահական տաքսի ավտոմեքենայի մեջ գտնվող իր նորածին երեխային անհայտ անձինք առևանգել են:

Ոստիկանության Վաղարշապատի բաժնում սկսվել է հետաքննություն: Քրեական գործ դեռևս հարուցված չէ:

Երեխայի առք ու վաճառքը քրեորեն պատժելի արարք է: Քրեական օրենսգրքի 168-րդ հոդվածն այսպիսի գլխագիր ունի. «Խնամքը ստանձնելու նպատակով երեխայի առքը կամ ստանձնողի խնամքին հանձնելու նպատակով երեխայի վաճառքը»: Այսինքն, պատասխանատվություն է նախատեսվում երկու կողմերի համար էլ: «Խնամքը ստանձնելու նպատակով երեխայի առքը կամ ստանձնողի խնամքին հանձնելու նպատակով երեխայի վաճառքը պատժվում է ազատազրկմամբ՝ երկուսից հինգ տարի ժամկետով»,- ասվում է մեջբերված հոդվածի 1-ին մասում:

Նորածին երեխայի խնամքը ստանձնած ամուսիններն ապրում են Վաղարշապատ քաղաքում: Մայրը մարզի գյուղերից մեկի բնակիչ է:

Նշենք, որ էլեկտրոնային լրատվամիջոցներում տեղեկություն կար, որ երեխայի խնամակալության հետ կապված առկա է Վաղարշապատի հոգաբարձուների խորհրդի որոշում: Քաղաքապետարանի լրատվական ծառայությունից մեզ պատասխանեցին, որ քաղաքապետարանում գործում է խնամակալության հանձնաժողով, իսկ նշված խնդիրն այդ հանձնաժողովի իրավասությունների ոլորտում չէ: Վաղարշապատի քաղաքապետարանից այդուհանդերձ տեղեկացրին, որ վերոնշյալ անձինք այդ հանձնաժողովին չեն դիմել:

Արմավիրի մարզպետարանի աշխատակազմի ընտանիքի, կանանց և երեխաների իրավունքների պաշտպանության բաժնի պետ Ասթինե Ապիտոնյանը մեր զրույցում ասաց, որ դեպքի մասին ինքը տեղյակ է: Օրեր առաջ պարզել է, որ Դմիտրիի և Իննայի ընտանիքում երեխա կա: Ամուսիններն, ի դեպ, երկար տարիներ երեխա չեն ունեցել: 45-ամյա Դմիտրին և 33-ամյա Իննան մեծացել են մանկատանը:

Ըստ տիկին Ապիտոնյանի, նրանք վստահեցրել են, որ փոքրիկի մայրն իրենց բարեկամուհին է, դա նրա 8-րդ երեխան է, ընտանիքն ապրում է չափազանց ծանր սոցիալական պայմաններում, և մայրը ցանկացել է, որ որդեգրեն նորածնին»։

 «Հայկական ժամանակ» օրաթերթ:

«Ստիպված եմ հերթական անգամ հիասթափեցնել Ռուբեն Հայրապետյանին մեղավոր կարգողներին…».Ամրամ Մակինյան

22.05.2020

Երևանում օրգազմի մասին պատմող գրքեր են բաժանել երեխաներին

25.05.2020

Սերժ Ազատի Սարգսյանի մասնակցությամբ կայանալիք դատական նիստը կհետաձգվի.Ամրան Մակինյան

20.05.2020

Վաղ առավոտյան սպեցնազն անցել է գործի. Սյունիքում տեղի են ունենում զանգվածային ձերբակալություններ.«Փաստինֆո»

24.05.2020

«Դա ոչ թե Միքայել, այլ Լարիսա Մինասյանն է եղել».Նարեկ Մալյան

23.05.2020

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով