«Սասնա ծուռ» լինես, թե Աստծո հրեշտակ, իրավունք չունես զենք գործածել քո ժողովրդի դեմ. Ռազմիկ Դավոյան

Սեփական ժողովրդի և երկրի դեմ ով էլ զենք գործածի, անկախ նպատակներից, արդարացում չունի: Դա թշնամություն ու դավաճանություն է: Ինչ ծառայություն էլ հայրենիքին մատուցած լինի մարդը, իրավունք չունի զենք բարձրացնել երկրի ներսում:ՀայՄեդիա.am-ի հետ զրույցում նման կարծիք հայտնեց բանաստեղծ Ռազմիկ Դավոյանը՝ անդրադառնալով նախորդ տարվա հուլիսին «Սասնա Ծռեր» զինված խմբի իրականացրած գործողություններին և դրա հետևանքներին:

«Զենքը սահմանին թշնամու կամ հակառակորդի վրա գործածելու համար է, ոչ թե սեփական ժողովրդի: Մեր էպոսում Սասնա ծռերը իրենց ժողովրդին չէին ոչնչացնում. նրանք Մըսրա մելիքների ու խալիֆների դեմ էին պայքարում: Եվ ի վերջո, ուզում ես Սասնա ծուռ եղիր, ուզում ես՝ Աստծո հրեշտակ, քո երկրի մեջ իրավունք չունես զենք օգտագործել՝ անկախ նպատակից»,- ասաց բանաստեղծը:

Ըստ նրա՝ պետք է հակառակը տեղի ունենա. ով ինչ կարողություն և զորություն ունի, պետք է ներդնի հօգուտ երկրի: «Լինեն Սասնա ծռեր, կուսակցականներ թե այլ խմբեր, պետք է իրենց միջոցները կենտրոնացնեն երկրի ու ժողովրդի վիճակը լավացնելու, բանակը զորացնելու ուղղությամբ»,- նշեց Դավոյանը: Իսկ նախորդ հուլիսին «Սասնա ծռեր» խմբի գործունեությունը նա որակեց որպես սպառնալիք պետության ու ազգի գոյության հանդեպ:

 

ՀայՄեդիա.am

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով