[:hy]ՀԱՅԱՍՏԱՆ — ԷԼ ՍԱԼՎԱԴՈՐ ՀԱՆԴԻՊՈՒՄԸ ԹՎԵՐՈՎ ՈՒ ՓԱՍՏԵՐՈՎ[:]

[:hy]Առաջին անգամ մրցելով Էլ Սալվադորի հավաքականի հետ, Հայաստանի ընտրանին 4 անպատասխան գնդակ ուղարկեց մրցակցի դարպասը՝ տոնելով 2-րդ անընդմեջ հաղթանակն ամերիկյան մրցաշրջագայությունում:

ՀՀ հավաքականն իր պատմության մեջ 4-րդ անգամ խաղը շահեց 4:0 հաշվով: Նախկինում մեր հավաքականը նման հաշվով պարտության էր մատնել Անդորրայի (2010թ.), Սլովակիայի (2011թ.) և Դանիայի (2013թ.) ընտրանիներին ընտրական մրցախաղերում: Սալվադորցիների նկատմամբ տոնած խոշոր հաշվով հաղթանակը մեր հավաքականի համար 11-րդն էր անցկացրած 177 հանդիպումներում: Դրանցից 3-ը գրանցվել են ընկերական խաղերում:

Վերջին 2 հանդիպումներում ՀՀ հավաքականն աչքի ընկավ աննախադեպ բարձր արդյունավետությամբ՝ խփելով 11 գնդակ: Հետաքրքիր է, որ այդ քանակի գոլեր մեր ֆուտբոլիստները խփել էին անցկացրած նախորդ 15 հանդիպումներում միասին վերցրած: Դրանցից 9-ը մեր հավաքականը խփել էր Բերնար Շալանդի օրոք, 2-ը՝ Սարգիս Հովսեփյանի գլխավորությամբ:

ՀՀ հավաքականն ընկերական 67-րդ հանդիպումն անցկացրեց՝ տոնելով 21-րդ հաղթանակը: 12 անգամ խաղն ավարտվել է ոչ-ոքի, 34 խաղում էլ մեր ընտրանին պարտություն է կրել: Մեր ֆուտբոլիստները 70 գոլ են խփել, սեփական դարպասը բաց են թողել 119 գնդակ:

Սալվադորցիների հետ մրցավեճը չեզոք դաշտում մրցակիցների հետ անցկացրած 25-րդ հանդիպումն էր, որում Հայաստանի հավաքականը 9-րդ հաղթանակը տոնեց: Մնացած հանդիպումներից 6-ում գրանցվել է ոչ-ոքի, 10-ում մեր հավաքականը պարտվել է: Խփած և բաց թողած գնդակների հարաբերությունն է 37:38:

Սալվադորցիների հետ մրցավեճը Վարուժան Սուքիասյանի գլխավորությամբ ՀՀ հավաքականի անցկացրած 20-րդ խաղն էր, որում մեր ֆուտբոլիստները 5-րդ հաղթանակը տոնեցին (մնացած խաղերից 8-ում ոչ-ոքի է գրանցվել, 7-ում հավաքականը պարտվել է, գնդակների հարաբերությունը՝ 28:28):

Հունիսին Հայաստանի հավաքականի անցկացրած 24-րդ խաղում մեր ֆուտբոլիստները 8-րդ հաղթանակը տոնեցին: 4 խաղ ավարտվել է ոչ-ոքի, 12-ում հավաքականը պարտություն է կրել: Մեր ֆուտբոլիստները մրցակիցների դարպասը խփել են 29 գնդակ, սեփականը բաց են թողել 38 գոլ: Վերջին հաղթանակը հունիսին հավաքականը տոնել էր 2013թ.՝ Կոպենհագենում կայացած աշխարհի առաջնության ընտրական մրցախաղում 4 անպատասխան գնդակ ուղարկելով դանիացիների դարպասը: Իսկ ահա նախորդ երկու տարիների հունիսյան հանդիպումները շատ անհաջող դասավորվեցին մեր հավաքականի համար՝ զիջելով Գերմանիայի (1:6) և Պորտուգալիայի (2:3) ընտրանիներին:

Գեղամ Կադիմյանը 2-րդ անընդմեջ խաղում գոլի հեղինակ դարձավ: Նա հավաքականում ընդամենը 3 խաղ է անցկացրել՝ նորամուտը նշելով այս տարվա մարտի 25-ին Բելառուսի ընտրանու հետ Երևանում կայացած ընկերական մրցախաղում:

Հովհաննես Համբարձումյանն ու Տիգրան Բարսեղյանը բացեցին գոլերի հաշիվն ազգային հավաքականում: Ընդհանուր առմամբ ՀՀ հավաքականի կազմում գոլերի հեղինակներ են դարձել մեր ընտրանու 54 ֆուտբոլիստներ:

ՀՀ հավաքականի հանդիպումներում գրանցվեց 4-րդ ինքնագոլը, որի հեղինակը սալվադորցի Խավիեր Գարսիան էր: Նախկինում ՀՀ հավաքականի մրցակիցներից սեփական դարպասը գրավել էին անդորրացի Օսկար Սոնեխեն, բելառուս Դմիտրի Վերխովցովը և ալբանացի Մերգիմ Մավրայը:

Դավիթ Հակոբյանն ու Սերգեյ Ավագիմյանը նորամուտը նշեցին Հայաստանի ազգային հավաքականի կազմում: Հավաքականի անցկացրած 177 հանդիպումներում ընդհանուր առմամբ 179 ֆուտբոլիստ է հանդես եկել:

0331_o

Աղբյուր` Armsport.am[:]

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով