[:hy]Ծեծկռտուք ՌՈ տեսուչի եւ ԼՂՀ ՊԲ 4 սպաների միջեւ. ձերբակալելիս ոստիկանները ծեծել են սպային[:]

By | 17.06.2016

[:hy]Հունիսի 14-ին Վարդենիս քաղաքում վիճաբանություն եւ ծեծկռտուք է տեղի ունեցել ռազմական ոստիկանության բաժանմունքի տեսուչի եւ ԼՂՀ Պաշտպանության բանակի 4 սպաների միջեւ:

Մեր տեղեկություններով, ՊԲ 4 սպաները՝ մայոր Արա Զախարյանը, լեյտենանտ Լ. Սահակյանը ավագ լեյտենանտ Կ. Մարտիրոսյանը եւ լեյտենանտ Տ. Անախասյանը արագ երթեւեկելիս են եղել, երբ ստուգատեսում ծառայություն իրականացնող տեսուչ Անդրանիկ Մաթեւոսյանը կանգնեցրել է նրանց ավտոմեքենան: ՊԲ 4 սպաներին դուր չի եկել այն, թե ինչպես է տեսուչը կանգնեցնում իրենց ավտոմեքենան, ինչի պատճառով առաջացել է վիճաբանություն. սկսվել է ծեծկռտուք: Ըստ նախնական տեղեկությունների՝ սպաները մետաղյա խողովակով բռնություն են գործադրել տեսուչի նկատմամբ՝ նրան պատճառելով բազմաթիվ մարմնական վնասվածքներ: Նա այժմ գտնվում է Վարդենիսի հոսպիտալում: Ռազմական ոստիկանության տեսուչը ստացել է ձախ նախաբազկի հետին մակերեսի ստորին պատռած վերք, գլխի եւ մարմնի տարբեր հատվածներում փափուկ հյուսվածքների սալջարդ, քերծվածքներ, ատամի շրջանի լնդի պատռվածք:

ՀՀ քննչական կոմիտեի մամուլի խոսնակ  Սոնա Տռուզյանը երեկ մեր զրույցում հաստատեց վիճաբանության եւ ծեծկռտուքի մասին տեղեկությունները: Մեր հարցին ի պատասխան նա ասաց, որ հունիսի 15-ին ռազմական ոստիկանության տեսուչի նկատմամբ բռնություն գործադրելու դեպքի առթիվ հարուցվել է քրեական գործ՝ ՀՀ քրեական օրենսգրքի 316 հոդվածի 2-րդ մասով (իշխանության ներկայացուցչի նկատմամբ կյանքի կամ առողջության համար վտանգավոր բռնությունը՝ կապված նրանց կողմից իրենց ծառայողական պարտականությունները կատարելու հետ): Քրեական գործի շրջանակներում 4 անձ ձերբակալվել է: Նրանց նկատմամբ նշանակվել են դատաբժշկական փորձաքննություններ, կատարվում է քննություն օբյեկտիվ իրականությունը պարզելու համար: Մեր տեղեկություններով, նախաքննության ընթացքում ձերբակալված սպաները անցել են սթափության փորձաքննություն, որով պարզվել է, որ ավտոմեքենայի ղեկին գտնվող Տ. Անախասյանը եւ մայոր Արա Զախարյանը գտնվել են ոչ սթափ վիճակում:

Նույն այդ  տեղեկություններով, արդեն դեպքից հետո, ռազմական ոստիկանության աշխատակիցները բերման ենթարկելիս բռնություն են գործադրել մայոր Արա Զախարյանի նկատմամբ: Մեր տեղեկությունների համաձայն՝ նրանք կապել են Զախարյանի ձեռքերը եւ սկսել հարվածներ հասցնել:  Տեսնելով, որ Զախարյանի մոտ արյունահոսություն է սկսվում, նրան տեղափոխել են «Սեւան» բժշկական կենտրոն: Երեկ բժշկական կենտրոնից հաստատեցին մեր տեղեկությունը, որ Զախարյանին տեղափոխել են իրենց հիվանդանոց, սակայն, թե ի՞նչ վնասվածքներ է ստացել մայորը, այդպես էլ չասացին՝ հորդորելով գրավոր հարցում ուղարկել: Այնուամենայնիվ, մեզ հաջողվեց ճշտել, որ Արա Զախարյանը ծեծի հետեւանքով ստացել է գլխի գագաթային շրջանի, մարմնի տարբեր հատվածներում փափուկ հյուսվածքների սալջարդ: Առաջին բուժօգնություն ցուցաբերելուց հետո ռազմական ոստիկանության աշխատակիցները նրան տարել են: ՀՀ քննչական կոմիտեի մամուլի խոսնակ Սոնա Տռուզյանը, սակայն, մեր հարցին ի պատասխան ասաց, որ նման հաղորդում քրեական գործի շրջանակներում չի ստացվել: «Բնականաբար, եթե նման ահազանգ լինի՝ պատշաճ քննության առարկա կդառնա»,- հավելեց Տռուզյանը: Մեզ հաջողվեց նաեւ ճշտել, որ ձերբակալվածներից միայն մեկն է ինքնախոստովանական ցուցմունք տվել, Արա Զախարյանն առայժմ լռում է. նա դեռ ցուցմունք չի տվել:

32-ամյա մայոր Արա Զախարյանը, որը ծառայում է ԼՂՀ ՊԲ զորամասերից մեկում, բնակվում է Գեղարքունիքի մարզի Գեղհովիտ գյուղում: Մեր զրույցում նրա մորաքույրը՝ տիկին Սոնան նշեց, որ դեպքի մասին ոչինչ չի կարող ասել. «Մի կաշմառ պատմություն է: Պատմում են, որ Արան ծեծված է, կապտած տեղեր ունի, ջարդված տեղեր ունի: Հիմա, թե ինքն էլ ում է ծեծել, ինչ է արել, պատճառն ինչ է եղել, չեմ կարող ասել: Փաստորեն, այսօր 4 զինծառայող ձերբակալված են, մեր սահման պահող զինվորներն են: Այս պատերազմական երկրում չորս զինծառայողի տանեն պահեն, ինչ-որ դատական գործընթաց բացեն մի հատ ոստիկանի ծեծի պատճառո՞վ: Ասենք՝ հա ծեծել-ծեծել են, ինչի՞ են այսքան մեծ պատմություն դարձնում, հիմա աշխարհն է խառնվել իրար: Չեմ ասում լավ են արել՝ ողջունենք, բայց նաեւ երիտասարդ կադրեր են, ափսոս են»,- ասաց տիկին Սոնան: Խոսելով Արա Զախարյանի մասին, նա ասաց, որ քրոջ որդին 12 տարի է, ինչ աշխատում է Զինված ուժերում, մասնագիտությամբ իրավաբան է. «Նա շատ կայացած անձնավորություն է, հենց այնպես հո չեմ ասում, բավականին պատվոգրեր ունի հրամանատարներից: Նա այնպիսի երիտասարդ չէ, որ գնար ու պատահական կռիվ աներ, ասում են, որ այդ ոստիկանն էլ քարով իր գլխին է հարվածել, չգիտեմ, շատ խառը պատմություն է, դրա համար ոչինչ ասել չեմ կարող: 4 զինվոր եք բռնել դատում, սահմանն ո՞վ պիտի պահի»,- ասաց ձերբակալվածի մորաքույրը: Նա տեղեկացրեց, որ Արա Զախարյանը ամուսնացած չէ, ունի մեկ եղբայր, որը Երեւանում աշխատում է որպես փաստաբան:

Հավելենք, որ մեղադրանքը հաստատվելու դեպքում ԼՂՀ Պաշտպանության բանակի չորս սպաներին սպառնում է հինգից տասը տարվա ազատազրկում: Կպատժվե՞ն արդյոք մայորին ծեծի ենթարկած ռազմական ոստիկանության աշխատակիցները, թե՝ ոչ, դժվար է ասել:

84623

Armtimes.com[:]

«Խնդրում եմ hraparak.am կայքին դադարեցնել տարածել մեր մասին չստուգված և իրականությանը չհամապատասխանող տեղեկատվություն».Դավիթ Համբարձումյան

07.07.2020

Չպետք է մոռանալ, որ հայ դպրոցի հիմնադիրը Հայ առաքելական եկեղեցին է ․․․

08.07.2020

«Սորոսի կողմից հովանավորվող տռանս պոռնիկները գալու են ձեր տուն, ձեր երեխաների հետևից».Նարեկ Մալյան

06.07.2020

Մինչև արտակարգ դրության ավարտը ժամկետը լրացած անձը հաստատող փաստաթղթերը կհամարվեն վավեր

07.07.2020

«Ճաշի մեջ ընկած մազը»․ ֆրանսիայի հոդվածը՝ Արսեն Թորոսյանին

08.07.2020

Թողնել պատասխան

Ձեր էլ-փոստի հասցեն չի հրապարակվելու։ Պարտադիր դաշտերը նշված են *-ով